www.24work.blotsport.com

Blogger Widgets Blogspot Tutorial Blogger Widgets Blogspot Tutorial

Monday, June 17, 2013

Tulaai Leitung thuthang tuamtuam updates June 17, 2013 · Malaysia gam Sapan Court pan UNCH card lah neilo, Work Permit zong aneilo kawlgammi 50 6/17/13 ni in thusitna thuak uh a, 6/18/13 niciang in 137 thusitna thuak leuleuding hi. Azenzen in amawhna uh akimuh aleh thong kum 5 kia in satnih ta leh Rm 10,000 ta piakhading uhhi. Bangmah atawi lo Zomi akua mapeuh pilvaangding kisam hi. · June kha 15-17 nidong nithum sung Myanmar-Thai gamgi a DKBA makaihnatawh kibawl mualtungmi namkee palaaite thukikupnawi na ah athupipeen in kawlgam I 2008 thukhunpi kheelnading ngetkhopding in thukimna nei uhhi. · Kawlgambup Pailik Phualpi Nypidaw pan palik 100 ding in 6/16/13 ni in Sagiang Division Palik zumpite ahi Kawlpi palikzumpi leh Tamu palikzumpi te buluh uh a Kawlpi palik zumpi Bu Zaw Naing Tun khutsungpan mawtaw License neilo 20 leh Tamu Palik Bu U Hla Win I mawtaw tungpan India gam apuakding zatui pawlkhat mankhia uhhi. Kawlgam hoihding ongkipan toto sam hileh kilawm ei · Mon Pitit Party Vice Chairman U Naing Zaw Sah kum 67 Thailand gam SankhalahBuri zatopi ah gawlsung damlohna hang in 6/15/13 ni in leitung nusia hi. Amah peen 1970 pan tunidong kum 40 sung Mon minam te amakaih mipil lungduai makaai hoih khat ahihban ah Kawlgam kumpi tawh kilemna bawlna ah makaai ahihi. Ama ong nusiatna hang in Daw Aung San Suu Kyi leh Kawlgam kumpi zumpan lungzuanna laai khakciat uhhi. · Kawlgamsung ah gamvaaitawh thongkia mikheempeuh khatzong siitlo in asawtlo in kikhahtading hi ci in thongkia te kancian kipawlna makaaipi lah ahi kawlgam President zum Vuanzi lah ahi U Soe Thein in 6/16/13 Yangon khuapi kileemna phualpi a thongkiavaaikanpawl I a 4 veina thukikupna ah kamciampia hi. · Turkey gam a abeisa kaalnih laaipan mipi lungphona lahnatawh kisai in lungphona aneimipite khawlsakding ama mawhpuak ahihna leh palik ten akhawlsakzawhkei aleh gaalkaap tung ah huhna ngen a khawlsakding hi ci in amalam apang mipitetung ah 6/17/13 ni in Turkey Kumpipan genkhia hi. · Leitung ah June kha nipi nihna weekend peen Pa ni ci in kiciamteh in pa te pahtawina patetung ah thuphangetna innkuan ann neekkhopna in gualnuamtak in kizang himah leh tukum 2013 June kha kaalnihna weekend sung bekbek in USA gam Chicago khuapisung ah mi 7 kikaaplum in mi 26 thautawh kikaap a, mi 30 nasiatak in liam hi ci in Chigaco police department te in 6/17/13 ni in taangkokhia uhhi. · G8 thukikupna kahding in President Obama Washington DC pan Ireland gam Belfast khuapi 6/17/13 ni zingsang in tungta a , tuni mah in Britain Prime Minister David Cameron leh Russia President Vladimir Putin tawh atuamtuak in Syria gam vaai kimuhkhopna nei uhhi. · China gammi mittaw sitni Chen Guangcheng New York University te in June khabeima in na innkuan un kiheemkhia un ci in thupia hi ci in Chen in 6/17/13 ni in genkhia hi. Amahpeen mihing zaleenna tawh kisai China gam ah asepna hang in China kumpi te in 2005-2006 kum in kum 4 thong khia uha 2010 ongsuahtaakciang kumkhat sung a innphualzang ah kikhumcip laai hi. 2012 kumpan USA ah ongtaaikhia a New York University te in sang amawkna in kahsak in zumkhan tuamkhat pia uha a innkuan un aomnading sangnaai ah innkhat zong apiak uh ahihi. · New Zealand gam Auckland khuapi inn that 15 tungdawnpan 6/17/13 ni sun nai 2 pawl in British mi Tom Stilwell kici khat kiasuk ek a athulamdang mahmah in tawm liamsam napin silo in damzen hi. · N Korea te in US tetawh Nuclear vaai kihoding in 6/17/13 ni in heelna zawllaai puakta uhhi. A hizong in US ten bel kiho theih hiven ah ahizong N Korea gam khalnavaaibel kikhiam kilkel kenteh cihsan uhhi. · India gam Himachal Pradesh state Uttarakhand kiimteng ah 6/16/13 pan tunidong guahtamlua in tuikhang ahihman in inn teng tui in taai a mi 19 si in 12 mangthang a mi atul asim in amuanhuaina munzong in taaikeek uhhi.

No comments:

Post a Comment